Bailte

Faisnéis

Sraith nua ocht gclár de Bailte ina dtabharfaidh Síle Nic Chonaonaigh cuairt ar bhailte fearainn ar fud na hÉireann chun an ceangal atá ag daoine leis an áit as a dtagann siad a fhiosrú. Fiosróidh sí an tírdhreach a mhúnlaíonn iad, an cultúr as ar fáisceadh iad agus na slite beatha a chothaíonn iad. I measc na mbailte a dtabharfaidh sí cuairt orthu sa tsraith nua seo beidh An Bun Beag i nGaoth Dobhair, Co. Dhún na nGall, An Gleann in Uíbh Ráthach, i ndeisceart Chiarraí agus cuirfear tús leis an tsraith ar an mBaile Uachtarach i gCorca Dhuibhne i gCo. Chiarraí.

Béarla G

▶  Féach
Clochán Bréanainn, Corca Dhuibhne

Eipeasóid 1

S4 E1 24m

Tugann Síle aghaidh ar Chlochán Bréanainn sa Leith Triúigh i gCorca Dhuibhne agus taispeánann an file Mícheál Ó Ruairc an Séipéal ina mbíodh dealbh de Chrom Dubh di. Buaileann sí le Thomas O'Connor a bhfuil clú air ar fud na tíre mar lomaire caorach agus téann sí ar thuras farraige chomh fada leis an tSás le Eugene Lyne. Tugann sí lámh chúnta do Phádraig i dtabhairne Uí Mhurchú ar an gCé agus caitheann sí tráthnóna le Máiréad Ní Dhubhda, bean mhór cártaí. Críochnaíonn sí a turas sa Tinteán Ceoil.

Leitreach Ard, Conamara

Eipeasóid 2

S4 E2 25m

Tá Leitreach Ard suite ar an gcósta thiar de leithinis Iorras Aithneach i gConamara. Tá suas le céad duine ina gcónaí ann agus radharc breá acu ar Chuan na Beirtrí Buí agus ar na Beanna Beola. Casann Síle Ní Chonaonaigh le hiascairí agus le saora báid, téann sí chun farraige le baill ón gclub mara nua-bhunaithe agus casann sí leis an amhránaí ar an sean-nós, Johnny Mháirtín Learaí Mac Donnchadha.

Toraigh, Dún na nGall

Eipeasóid 3

S4 E3 24m

Is é Toraigh an t-oileán is faide amach ó chósta na hÉireann a bhfuil cónaí air. Suite níos mó ná naoi míle amach ó chósta Dhún na nGall is cinnte gurb é seo an áit is iargúlta a thug Síle cuairt air le linn na sraithe. Casann Síle le Anton Meenan a insíonn scéalta di ón gcré-umhaois, déanann Marjorie Carroll cur síos ar na pleananna atá ag muintir Thoraí agus tugann captaen an Tor Dearg, Willie Ghráinne Ó Dubhgáin ar thuras báid í.

Baile na nGall, Na Déise

Eipeasóid 4

S4 E4 24m

Tá Baile na nGall i nGaeltacht na nDéise i gContae Phort Láirge. Suite i lár Heilbhic, Maoil a Chóirne agus Cnocán a Phaoraigh is é Baile na nGall an baile is lú i Rinn Ó gCuanach. Tá radharc breá ar Shléibhte an Chomaraigh as Baile na nGall agus ar an bhfarraige ar dhá thaobh den bhaile. Casann Síle le hamhránaithe agus le scríbhneoirí as an gceantar sa gclár seo agus tugann sí cuairt ar Chriostal na Rinne.

An Bóthar Buí, Conamara

Eipeasóid 5

S4 E5 25m

Tugann Síle Ní Chonaonaigh aghaidh ar an mBóthar Buí ar an gCeathrú Rua i gConamara. Tá teacht aniar i muintir na háite seo agus tá an-chuid staire ag baint leis an áit freisin. Buaileann Síle le healaíontóir, bláthadóir, teifigh ón Úcráin agus le Tomás Mac Eoin, amhránaí agus file mór le rá as an gceantar. Tá an traidisiún fite fuaite leis an saol nua-aimseartha sa mbaile beag seo.